VOK NEUTRAL – Diurnal modern in Idiom Neutral, numr 4

Mi av ya kompletifiked preparasion de numr 4 de VOK NEUTRAL (yuli-august 2010). Siloke, kuale ordinare, mi present fotografad de pagin prim. Publikasion ofisial esero posidiurne, mi adyunktero it a seksion de dokumenti in grupi de Idiom Neutral e posta_Mundi (YahooGroups).

Ekse kontenad:

– salutparoli da redaktator
– tekst di urb Helsinki
– Charles Ezra Sprague – Volapükist famos
– lingu Spokil
– kelk proverbi

“Skandal in Bohemia” (parti 25)

“Vo vis,”  Holmes observav, kuande noi pasuav a ulteriore e a siteriore, anteriore de dom, “ist matrimoni simplifik plu volontare aferi. Fotografad deveni arm dupl-bordik sitempe. Fortuiti es tal, ke ila eserio tale deinklinant da fakt, ke it eserio vised per Sinior Godfrey Norton, kuale nostr klient es deinklinant da fakt, ke it venierio a okuli de sie prinsa.
Sitempe kuestion es tal: “Keloke noi potes truvar fotografad?”

“Keloke, verase?”

“It es leplu neprobabl, ke ila port it sempre ko su. It av granditet portretik. Tro grand a okultar it fasile in vest de femin. Ila konos, ke Reg es kapabl a preparar atak neekspekted e shershar sie plas. Du tal provi av ya esed fasied. Ergo noi potes suposar, ke ila no port it ko su.”

“Ergo keloke?”

“Sie banker u sie advokat. Eksist ist posiblitet dupl. Ma mi es inklined a no pensar di ist du posibliteti. Femini es nature sekretos, e ilai am fasiar sue aferi sekretik propr. Kekause ila deberio inmanuar it a kelkun otr? Ila poteserio konfidar sue kustodasion propr, ma ila no poteserio dikar, kual influens nedirekt e politikal poteserio esar adported a presar su negosiant. Ekstr it, memoria, ke ila avav resolved a usar it durantu kelk diurni. It deb esar plas, keloke ila potes metar sue manui su it. It deb esar sie dom propr.”

“Skandal in Bohemia” (parti 24)

Il disaparav in sue bedkamr e returnav po kelk minuti in karakter de kleran Nonkomformistik amabl e simpl. Sie shapó negr larg, sie pantalon sakatr, sie kravat blank, sie subrid simpatiik, e aspekt general de spekt e kuriositet benevolent esav tal, ke Sinior John Hare aut potesav avar egualesked. It esav no sole, ke Holmes kambiav sue kostum. Sie ekspresion, sie manier, sie anim aut semblav variar ko omni parti fresk, kel il akseptav. Sken perdav aktor fin, ipse kuale sient perdav resonator akut, kuande il deveniav spesialist in delikt. It esav hori seks e un kuart, kuande noi partav da Baker Street, e noi avav ankor nesesitet de des minuti usk hor kuande noi truvav noi aut in Alé Serpentinik. It esav ya obskur, e lampi esav yuste ilumined, kuande noi pasuav a ulteriore e a siteriore, anteriore de Briony Lodge, atendante veni de sie okupator. Dom esav yuste tal, kual mi avav imagined it da narasion presis de Sherlock Holmes, ma lokal semblav esar minu privat ka mi ekspektav. Totale kontre it, pro strad minim in visinitet trankuil, it esav notable animed. Esav grup de viri miserable vested, fumant e ridant in angul, esav tonsator-molinist ko sue rot, du gardatori amoros ko puera-nutriatora, e kelk viri yun bene-vested, keli ambulav a ulteriore e a siteriore ko sigari in sue boki.

“Skandal in Bohemia” (parti 23)

“E kekos posteriore?”

“Vo deb lasar elkos a mi. Mi av ya orded telkos, kel deb aveniar. Es sole un punkt, su kel mi deb instar. Vo no potes inmiksar vo, nedependante da omnikos, kel aveni. Eske vo komprend?”

 “Eske mi deb esar neutral?”

 “Fasiar nokos in omni kasu. Esero probable kelkun neagrablitet. No intra in it. It esero finied ko mi esant ported in dom. Kuatr u kuink minuti posteriore fenestr de sed-kamr esero aperied. Vo deb plasar vo aut proksimu el fenestr.” Vo deb spektar mi, kause mi esero visabl a vo.”

“Si”

“E kuande mi levero mie manu — tale — vo lansero in kamr telkos, kel mi donero a vo a lansar, e levero, in el sem temp, klam di fok. Eske vo seku mie pens?”

“Totale”

“It es nokos multe formidabl,” il dikav prendante rul long in form de sigar da sue vestsak. “It es fum-raket ordinar de hidrospesialist, ekiped mediu kuvrator ad omni fini, a fasiar it aut-lumant. Votr komision es restrikted a elkos. Kuande vo levero votr klam di fok, it esero sekued per grup gran de homi. Tetempe vo potes ambular a fini de strad, e mi veniero a vo po 10 minuti. Mi esper ke mi av eksprimed mi aut klare? ”

“Mi deb restar neutral, andar proksimu fenestr, spektar vo, e a signal inlansar ist obyekt, posteriore levar klam di fok e atendar vo ad angul de strad. ”

“Presise.”

 “Ergo vo potes totale konfidar mi.”

 “Elkos es ekselent. Mi pens, posible, ke it es kuasi temp, ke mi prepar mi aut pro rol nov, kel mi deb ludar.”

“Skandal in Bohemia” (parti 22)

“Ili es kekos?”

“Kelkun bifstek frigid e bokal de bir”, il respondav tintinante klok. “Mi av esed tro okuped a pensar di edad, e mi esero probable plu okuped ankor sivespre. Ad okasion, Doktor, mi avero nesesitet de votr kooperasion.”

“Mi sentiero delisi.”

“Eske vo no tim frangar leg?”

“Totale no.”

“Ni avar fortuit de arest?”

“No pro kaus bon”

“O, kaus es ekselent!”

“Ergo, mi serv a vo”

“Mi esav sert, ke mi potes konfidar vo.”

“Ma kekos vo desir?”

“Kuande Siniora Turner avero adported platil, mi eksplikero it a vo. Sitempe,” il dikav kuande il turnav se famele a platil simpl, kel nostr domera avav furned, “Mi deb diskutar it durante ke mi ed, kause mi av temp nemult. It es kuasi hor kuink.” Po du hori noi debero esar su sken de akt. Siniorina Irene, u Siniora, plu volontare, return da sue vehiklasion in hor sept. Noi deb esar ad Briony Lodge a okurar ila.”

Spokil av finie sue retpagin

Mi av yuste finied preparasion de retpagin pro lingu Spokil – lingu internasional ko karakter volapükatr, kreed sirka 1887 – 1890 per doktor Adolphe Nicolas da Fransia. Kuande Volapük populareskav, veniav pobreve temp de Esperanto, ma et de otr lingui mult. Spesiale lingui volapükatr deveniav popular in fini de sekul 19-im. Un eks ili esav Spokil, lingu ko struktur partie “a-posteriori”, ma ye in parti leplu grand – “a propri”. In anu 1904 doktor Nicolas publikav libr di Spokil skribed in lingu fransik, ko gramatik detaliik, teksti mult e du diksionari grand “fransik – Spokil” e “Spokil – fransik”. In 1907 doktor Nicolas presentav Spokil in Paris, a Delegad pro Adoptasion de Lingu Internasional. Et Idiom Neutral esav un eks lingui teloke presented. Doktor Nicolas indikav valor mnemoteknikal de sistem de paroli in Spokil, ma semble no resivav suport. Lingu esav kuasi oblivied e apar da temp a temp sole in listi monstrant lingui universal varios, ordinare ko tradukasion de “Pater Noster”. Mi av fasied labor plu grand e presented gramatik de Spokil plu detalie, ko eksempli mult. Mi esper, ke interlinguisti, keli av interes spesiale grand di lingui volapükatr, truvero kelkkos interesant in el pagin. Ekse sie adres:
http://sites.google.com/site/miespaispokil/

Published in: on August 2, 2010 at 5:16 am  Comments (2)  
Tags: ,