“Skandal in Bohemia” (parti 16)

In hor tri presise mi esav ad Baker Street, ma Holmes avav no ankor returned. Domera informav mi, ke il avav abandoned dom breve po hor ot. matine.  Mi sedeskav visinu fok, ye, ko intension atendar il, et if sie absentitet eserio long. Mi ya avav interes profund di sie eksplorasion, kause, negligante ke it esav sirkadoned per noun eks kualiteti obskur e estran, keli esav asosied ko ist du delikti, keli mi av ya registred, ye, natur de tel kasu e stand eksalted de sie klient donav it karakter propr. Verase, aparte da natur de eksplorasion, kel mie amik avav ad manu, kelkkos esav in sie sis de situasion, e sie resonasion akut e kritikos, kel kausav mi plesir studiar sie sistem de labor, e sekuar metodi rapid e subtil, mediu keli il dekomplikav misterii leplu nesolvabl. Mi esav tale kustomed a sie sukses nevariabl, ke posiblitet aut de sie fali avav sesed intrar mie kap. It esav proksim a hor kuatr, ante ke porta aperieskav e kavalan ko aspekt ebr, nenet e ko flankbarb, ko fas inflamed e vesti de mal reputasion, intrav kamr. Kustomed a potensi surprisant de mie amik in usasion de okulti, mi debav spektar trifoa ante ke mi esav sert, ke it esav verase il. Ko kapsalut il disaparav in bedkamr, da keloke il reaparav po kuink minuti, vested in “tuid” e respektabl, kuale anteriore. Metante sue manui in sue vestsaki, il ekstendav sue gambi ante fok e ridav kordiale durantu kelk minuti.

“Bene, vere!” il klamav, e posteriore il sufokav se e ridav denove usk ke il esav forsed retroyasiar se, flaksid e sine sukurs, in stul.

“Kekos es it?”

“It es totale tro amusant. Mi es sert, ke vo poteserio nokuande divinar, kuale mi utilisav mie matin, u finied it fasiante kekos.”

Advertisements

Di Yahoogroup de Idiom Neutral

Sidiurne mi mitav artikl di punkti komunik in Volapük e Idiom Neutral a grup de Idiom Neutral ad Yahoogroups. Mi pens, ke ekstr skribasion de blogi in Idiom Neutral, tal grup komunik pro personi, keli av interes di Idiom Neutral es afer multe bon. E komprendable et gaset bimensik “Vok Neutral” eksist. Regrete membri de grup pro I.N. es nemult (sitempe sole 8 personi) e movasion de ist lingu no es fort. Ma serte Idiom Neutral no es mortik!

Ekse adres de Idiom Neutral ad Yahoogroups:
http://tech.groups.yahoo.com/group/idiomneutral/

Adyunktad a artikl di Volapük e Idiom Neutral

Anteriore mi skribav artikl, in kel mi presentav 6 kosi komunik pro Volapük e Idiom Neutral, keli mi av truved durantu komparasion de ist du lingui bel.

Istfoa mi adyunkt ankor 4 paroli komunik, ergo ili present yunkte 10 kualiteti komunik, keli mi truvav. Mi av yuste adyunkted ili a artikl original.

“Skandal in Bohemia” (parti 15)

“E Irene Adler?”

“Ila menas mitar ili fotografad. E ila fasiero it. Mi konos, ke ila fasiero it. Vo no konos ila, ma ila av anim bon eks asier. Ila av fas de femin leplu bel, e intelektu de vir leplu resolut. Plu volontare ka if mi mariterio otr femin, no eksist limiti, a keli ila no anderio – noun.”

“Vo es sert, ke ila av no ankor mited it?”

“Mi es sert.”

“E kekause?”

“Kause ila av diked, ke ila miterio it in diurn, kuande fiansasion esav publike proklamed. Elkos esero lundi sekuant.”

“O, ergo noi av ankor tri diurni,” Holmes dikav ko osit. “Elkos es multe felis, kause mi av un u du aferi important a investigar sitempe. Vostr Mayestet restero, komprendable, in London pro sitempe?”

“Serte. Vo truvero mi ad Laugham sub nom de Komt Von Kramm.”

“Ergo mi mitero vo not a informar vo, kuale noi progres.”

“Fasia tale, if it plis. Mi esero plen de angust.”

“Ergo, konsernantu mon?”

“Vo av carte blanche.”

“Absolute?”

“Mi dik a vo, ke mi donerio un de provinsi de mie regnia a avar el fotografad.”

“E pro spendi?”

Reg prendav sak pesant eks kamosk-kuir da sub sue mantel e posav it su tabl. “Istkos es trisent livri in aur e septsent in bilieti,”  il dikav.

Holmes skribav kuit su papir-foli de sue papir-libr e donav il it. “E adres de Mademoiselle?”  il interogav.

“It es Briony Lodge, Serpentine Avenue, St. John’s Wood.”

Holmes notav it.  “Ankor un kuestion,”  il dikav. “Eske fotografad esav portretik?”

“Si, it esav tal.”

“Ergo, noktu bon, vostr Mayestet, e mi kred, ke noi avero pobreve kelkun avis bon pro vo. E noktu bon, Watson,” il adyunkted, kuande roti de fiakr regik rotav longu strad. “If vo poteserio esar sufise bon a veniar posidiurne in hor tri pomedidiurne,  mi voluerio parlar di ist afer minim ko vo.”

“Skandal in Bohemia” (parti 14)

“Presise tale. Ma kuale -”

“Eske matrimoni sekretik aksidav?”

“Noun.”

“Noun papir yuridik u sertifikasion?”

“Noun.”

“Ergo mi fali ko sekuasion de vostr Mayestet. If ist person yun produkterio sue letri pro menas u otr intenti, kuale ila potes prufar lor autentikitet?”

“Skribad eksist.”

“Pu, pu! Imitad.”

“Mie not-papir privat.”

“Rapied.”

“Mie sigil propr.”

“Imited.”

“Mie fotografad.”

“Akuired.”

“Noi esav omni du in fotografad.”

“O mie kar! Elkos es multe mal! Vostr Mayestet av verase fasied nediskretitet.”

“Mi esav lunatik — malad.”

“Vo av pudifiked seriose vo aut.”

“Tetempe mi esav sole Prins Koronik. Mi esav yun. Mi av pene trides anui sitempe.”

“It deb esar retroganied.”

“Noi av eforsed e faliav.”

“Vostr Mayestet deb payar. It deb esar akuired.”

“Ila no vendero.”

“Ergo, rapied.”

“Kuink eforsi av esed fasied. Dufoa rapinatori, a keli mi payav,  shershante demolav sie dom. Unfoa noi apokaptav sie bagaj, kuande ila voyajav. Dufoa ila av esed ataked. Noun resultad esav.”

“Noun sign de it?”

“Absolute noun.”

Holmes ridav. “It es problemet sufise minion.” il dikav.

“Ma multe serios pro mi.” Reg retrodikav reproshe.

“Multe, verase. E kekos ila propos fasiar ko tel fotografad?”

“Ruinar mi.”

“Ma kuale?”

“Mi esero marited.”

“Mi audiav istkos.”

“A Clotilde Lothman von Saxe-Meningen, filia sekund de Reg de Skandinavia. Vo potes konosar prinsipi strikt de sie famili. Ila aut es anim ver de delikatitet. Ombr de dubi di mie kondukt adporterio afer a fini.”

“Skandal in Bohemia” (parti 13)

“Ma vo potes komprendar,”  nostr visitator estran dikav, sedeskante denove e movante sue manu superioru sue front alt e blank, “vo potes komprendar, ke mi no es kustomed fasiar tal negosi in mie person propr. Ye afer esav tale delikat, ke mi no potesav konfidar it a agent sine metar mi aut in sie potens. Mi av venied “incognito” da Praha ko intent konsultar vo.”

“Ergo, konsulta, if it plis,” Holmes dikav, klosante denove sue okuli.

“Fakti es breve tal: ante sirka kuink anui, durantu visit long in Warszawa, mi konoseskav ko aventurera bene konosed, Irene Adler. Nom es sine dubi familiar a vo.”

“Afable shersha ila in mie nom-list, Doktor,”  Holmes murmurav sine aperiar sue okuli. Durantu anui mult il avav adopted sistem de kolektasion de omni paragrafi konsernant homi e kosi, tale ke it esav nefasil nomar tem u person, di kel il no poteserio nemediate furnar informasion. In ist kasu mi truvav sie biografi meted intr el di rabin hebreik e el di stab-shef, kel avav skribed monograf di piski de mar profund.

“Permita a mi visar!”  Holmes dikav.  “Hum! Naskavant in New Jersey in anu 1858. Contralto – hum! La Scala, hum! Prima donna de Opr Imperatorik in Warszawa – si! Retiravant se da sken oprik – ha! Residant in London – totale tale! Votr Mayestet, kuale mi komprend, intrav relasion ko ist person yun, skribav a ila letri pudifikant, e sitempe es desiros a retroresivar el letri.

Kualiteti komunik intr Volapük e Idiom Neutral

On dik, ke Idiom Neutral es Volapükid. Si, in kelkun sens it es Volapükid, ma spekta otr Volapükidi e kompara ili.  Mi am omni Volapükidi e mi av multe studied lor struktur, gramatik e paroli. If vo spekt Spokil, Spelin, Dilpok, Dil, Bolak, Bopal, Balta, Veltparl, Orba e otri, vo nemediate observero un kualitet komunik – simile a Volapük ili es nefasile komprendabl ad vis prim. Mi no dik, ke it es mal, kause mi persone am multe tal kualitet misterios in el lingui, ye mi volu monstrar diferens. Kuande on spekt Idiom Neutral, on ordinare potes komprendar teksti skribed in ist lingu. It no es important, if vo es esperantist, idist, novialist, occidentalist e.s., vo potesero komprendar parti grand in Idiom Neutral. Istkos es diferens grand intr Idiom Neutral e Volapük e otr Volapükidi, ma mi desir presentar in ist artikl, kual kualiteti komunik mi av truved intr Volapük e I.N. po mie studi profund de gramatik e diksionar de Idiom Neutral.

1. Adyektiv deb sempre esar posterioru substantiv, kel it deskrib.

In Volapük: zif gretik, bim smalik
In Idiom Neutral: urb grand, arbor minim

2. Omni adyektivi in Volapük fini se mediu “-ik”. Idiom Neutral es plu natural e sie adyektivi potes finiar se mediu literi varios, ye ordinare adyektivi, keli proveni da substantivi resiv finiad “-ik” kuale in Volapük.

In Volapük: men gudik, vilag belik
In Idiom Neutral: hom bon, vilaj montik
(nota eksempl sekund)

3. Parol “ko” es komunik.

In Volapük: Kanitob ko ol. Danüdol ko of.
In Idiom Neutral: Mi kant ko vo. Vo dans ko ila.

4. Parol “ka” et es komunik.

In Volapük: Dom olik binon jönikum ka dom omik.
In Idiom Neutral: Votr dom es plu bel ka sie dom.

5. Parol “if” es komunik in omni du lingui.

In Volapük: If no lärnol Volapüki, no kanol spikön oni.
In Idiom Neutral: If vo no aprend Volapük, vo no potes parlar it.
(nota, ke otr lingui artifisial ordinare av “si” u “se”)

6. Et parol “ye” es komunik in ist du lingui.

In Volapük: Volapük binon fikulikum ka Sperantapük. Ye id ol okanol suemön oni.
In Idiom Neutral: Volapük es plu nefasil ka Esperanto. Ye et vo potesero komprendar it.

7. Parol “ya” es komunik pro Volapük e Idiom Neutral.

In Volapük: Ya äfidob.
In Idiom Neutral: Mi ya edav.

8. Et parol “kel”.

In Volapük: Pösod, kel spikon Volapüki.
In Idiom Neutral: Person, kel parl Volapük.
(nota, ke et Novial us ist parol)

9. Et “no”.

In Volapük: No spikom Veltparli.
In Idiom Neutral: Il no parl Veltparl.
(nota, ke negligante ke ist parol no es kelkkos spesial, ye ordinare lingui artifisial us paroli “ne” u “non”)

10. Et “su”.

In Volapük: Buk binon su tab.
In Idiom Neutral: Libr es su tabl.

11. “u” final in preposisioni derivativ (“ü” in Volapük).

In Volapük: Nilü zif.
In idiom Neutral: Proksimu urb.

 

“Skandal in Bohemia” (parti 12)

“Pardona ist mask,”  nostr visitator estran kontinuav. “Person eminent, kel arend mi, desir ke sie agent es nekonosed a vo, e mi potes konfesar nemediate, ke titul, mediu kel mi av yuste nomed mi aut es no nesese mie propr.”

“Mi suposav it,”  Holmes dikav sike.

“Sirkumstansi es multe delikat, e omni prekaut deb esar prended a ekstinguar telkos, kel poteserio kreskar a esar skandal imens e pudifikar seriose un eks familii regnant de Europ. Parlante rekte, tel afer konsern famili magnifik Dom de Ormstein, regi heredant de Bohemia.”

“Mi suposav et elkos,”  Holmes murmurav, posante se aut in sue brasstul e klosante sue okuli.

Nostr visitator spektav ko kelkun surpris visabl a figur lent e inert de vir, kel avav esed sine dubi pikted a il kuale resonator leplu malisios e agent leplu energiik in Europ. Holmes reaperiav lente sue okuli e spektav nepasiente sue klient gigantik.

“If Vostr Mayestet poteserio kondesendar eksprimar vostr kasu,”  il observav, “mi eserio plu kapabl konsiliar a vo.”

Vir saltav da sue stul e pasuav per kamr in agitasion nekontrolabl. Tetempe, ko gestiluasion de desper, il ruptav mask da sue fas e lansav it su flur.

“Vo es rekt,”  il eksklamav;  “Mi es Reg. Kekause mi deberio eforsar okultar it?”

“Verase, kekause?”  Holmes murmurav. “Vostr Mayestet no avav parled anteriore ke mi komprendav, ke mi adresav Wilhelm Gottsreich Sigismond von Ormstein, Duk Grand de Cassel-Felstein e Reg heredant de Bohemia.”