“Skandal in Bohemia” (parti 11)

“Vo resivav mie not?” il interogav ko vok profund e rauk, e aksent germanik forte marked. “Mi dikav a vo, ke mi veniero.” Il spektav da un a otr de noi, kuale if il esav nesert,  ki adresar.

“Seda, if it plis,” Holmes dikav. “Ist es mie amik e koleg, Dr. Watson, kel es kelkfoa sufise bon a sukursar mi in mie kasui. Ko ki mi av honor parlar?”

“Vo potes adresar mi kuale Komt Von Kramm,  nobl bohemian. Mi komprend, ke ist sinior, votr amik, es vir de honor e diskretitet, a kel mi potes konfidar afer leplu ekstreme important. If no, mi multe prefererio komunikar ko vo sol.

Mi levav mi a andar, ma Holmes kaptav mi ad flekt e pusav mi retro in mie stul. “It es noi omni du, u nohom,” il dikav. “Vo potes dikar ante ist sinior omnikos, kel vo potes dikar a mi.”

Komt levav sue epoli larg. Ergo mi deb komensar,” il dikav, “obligante voi omni du a sekretitet absolut durantu du anui; in fini de el temp afer no esero important. Sitempe it no es eksagerasion a dikar, ke it av tal gravitet, ke it potes avar influens su histor europan.”

“Mi promet,” Holmes dikav.

“E mi.”

“Skandal in Bohemia” (parti 10)

Sert vir intrav, kel pene poteserio avar minu ka 6 pedi e 6 polsi de altitet, ko pektor e ekstremiteti de Herkules. Sie vest esav rik ko rikitet, kel eserio, in Anglia, spekted kuale simil a gust mal. Bandi pesant de karakul-pelti esav suted oblikue su manshi e fasadi de sie frak dupl-pektorik, durante ke mantel profunde blu, kel esav lansed su sie epoli, esav linied mediu set flam-kolored e asekured ad kol mediu dekor yuvelik, kel konsistav eks beril unupl flamant. Boti, keli atinav usk semiad de sie pulpi de gambi, e keli esav garned ad kulmini mediu pelt rik brun, kompletifikav impresion de opulentitet barbar, kel esav sugested mediu sie aspekt integr. Il tenav shapó ko bord larg in sue manu, durante ke il portav per parti superior de sue fas, esante ekstensed a inferiore ultra guen-osi, okult-mask negr, kel il avav semble adyusted in tel moment, kause sie manu esav ankor leved a it, kuande il intrav. Sekuantu parti inferior de fas il semblav esar vir ko karakter fort, ko labi gros e pendant, e menton long e rekt sugestant resolusion pused usk longitet de obstinasion.

“Skandal in Bohemia” (parti 9)

“Papir esav fabriked in Bohemia, ” mi dikav.

“Presise. E hom, kel skribav not es germanian. Eske vo observ konstruad partikular de fras – ‘Ist narasion di vo noi av da omni kuartieri resived’. Fransian u rusian no poteserio avar skribed elkos. It es germanian, kel es tale unpolit a sue paroli. It rest sole, ergo, dekuvrar kekos es desired per ist germanian, kel skrib su papir bohemian e prefer portar mask ka monstrar sue fas. E ekse il veni, if mi no er, a resolvar omni nostr dubii.”

Kuande il parlav, noi audiav son akut de ungui masiv de kaval e roti kratant ad pavbord, sekued per tir akut de klok. Holmes fifav.

“Par, son indik it,” il dikav. “Si,” il kontinuav, spektante eks fenestr. “Fiakr minion minim e par de beli. Sent kuinkdes guineai a omni un. Mon es in ist kasu, Watson, if nokos otr es la.”

“Mi pens, ke it esero plu bon, if mi andero, Holmes.”

“Totale no, Doktor. Resta teloke, ke vo es. Mi es perded sine mie Boswell. E istkos promet esar interesant. It eserio damnos, if noi mankerio it.”

“Ma votr klient …”

“No pensa di il. Mi potes avar nesesitet de votr sukurs e tale et potes il. Ekse il veni. Seda in el brasstul, Doktor, e dona noi votr atension leplu bon.”

Pasu lent e pesant, kel avav esed audied su skal e in pasaj, pausav nemediate eksterioru porta. Posteriore on audiav perkut sonor e diktant.

“Intra!” Holmes dikav.

Kelk ekspresioni tempik multe util

In Idiom Neutral noi potes krear ekspresioni tempik mediu sistem multe logikal.
A fasiar istkos, on av nesesitet de:

1. Parol tempik prinsipal, pro eksempl:
     hor, diurn, seman, mens, anu

2. Prefiks brev “si“, kel signifik kos u afer leplu proksim

3. Prefiks “pre” signifikant “ante” in sens, ke kelkkos aksid plu bontempe ka kelkun otr kos

4. Parolet “po“, kel av tal signifik, ke kelkkos aksid plu tarde ka kelkun otr kos

5. Parolet “plu” a monstrar distantitet tempik nemulte plu grand

Ekse eksempli plu detaliik:

I. HOR – period plu brev ka diurn, un diurn av 24 hori, un hor av 60 minuti.

sihore – durantu hor sitempik

presihore – durantu hor, kel ya pasav – ante un hor

posihore – durantu hor sekuant, po un hor da sitempe

plupresihore – ante du hori

pluposihore – po du hori

II. DIURN – period splendid da matin usk vespr

Da ist parol noi potes formar:

diurne – in tel period, kel es intr matin e vespr

sidiurne – in tel period intr matin e vespr e yuste sitempe

presidiurne – in diurn, kel esav ante noktu ultim

posidiurne – in diurn, kel veniero po noktu sekuant, leplu proksim

plupresidiurne – ipse ante du diurni

pluposidiurne – ipse po du diurni

(in komparasion ko diurn sitempik)

III. SEMAN – period, in kel 7 diurni es

sisemane – yuste durantu seman sitempik

presisemane – in seman, kel ya pasav

posisemane – po un seman da sitempe – in seman kel veniero

plupresisemane – ante du semani

pluposisemane – po du semani

IV. MENS – period ko 30 u 31 diurni (u ipse 28 u 29 in kasu de februar)

simense – durantu mens sitempik

presimense – ante un mens, kel ya pasav

posimense – po un mens – in mens sekuant

plupresimense – ante du mensi

pluposimense – po du mensi

V. ANU – period plu long – ko 12 mensi

sianue – in anu sitempik (ergo 2010)

presianue – in anu pasavant (ergo 2009)

posianue – in anu sekuant (ergo 2011)

plupresianue – ante du anui (ergo 2008)

pluposianue – po du anui (ergo 2012)

Ist sistem es multe klar. E if noi volu parlar di temp plu distant, noi dik:

ante …  (eksemple 5 diurni, 3 semani, 4 mensi, 6 anui)
po …  (eksemple 5 diurni, 3 semani, 5 mensi, 3 anui)

“Skandal in Bohemia” (parti 8)

Mi kurose eksaminav skribad e papir, su kel it esav skribed.

“Hom, kel skribav it esav suposable rik,” mi observav, eforsante imitar prosedi de mie kompan. “Tal papir no poteserio esar akuired kontr demi de “koron” a paket. It es partikulare fort e rigid.”

“Partikular – elkos es parol yust,”  Holmes dikav.  “It totale no es papir anglian. Tena it a superiore in lum.”

Mi fasiav tale, e visav “E” grand ko “g” minim, “P” e “G” grand ko “t” minim teksaved in superfisi de papir.

“Kekos vo komprend eks elkos?”  Holmes interogav.

“Nom de fabrikator, sine dubi; u sie monogram, plu volontare.”

“Totale no. “G” ko “t” minim signifik “Gesellschaft”, kel es germanik pro “Firma”. It es abreviasion ordinar kuale nostr “Co”. “P”, komprendable, signifik “Papir”. Sitempe visa “Eg”. Spektam nostr “Gasetist Kontinentik.” 

 Il prendav a inferiore tom pesant brun da sue librplanki.

“Eglow, Eglonitz – ekse: Egria. It is in land germanik-parlant – in Bohemia, no distant da Carlsbad. Notabl kuale lok de mort de Wallenstein, e kausu sue vitr-fabriki numros e papir-molini. Ha, ha, mie puer, kekos vo komprend eks elkos?”

Sie okuli briliav e il mitav a superiore nub grand, blu, triumfant eks sie sigaret.

Deo De Guer III veni in mars!

Pobreve omni amatori de seri “Deo de Guer” ko Kratos brutal e nemiserikordos, potesero festar arivasion de Deo De Guer III – ultim in ist seri e semtempe un eks videoludi leplu bon su sistem PS3. Partii prim e sekund esav fasied pro sistem ansian PS2, ma felise in novembr 2009 aparav Deo De Guer Kolektad spesiale prepared pro PS3, kontenant Deo De Guer e Deo De Guer II. Negligante ke ya ante kelk anui mi ludav ferve Deo De Guer, et sitempe, da novembr usk simense mi lud sine sesar omni du partii Deo De Guer e Deo De Guer II eks Kolektad pro PS3. Mi lud sitempe sole ist du ludi a esar bene prepared pro parti ters. Mi av luded ili multfoa e konos omni detalii e sekreti inu ist du ludi. Deo De Guer II es plu long ka parti prim, ma mi am ludar omni du. Mi av et Deo De Guer: Kateni De Olimpus pro PSP. It es plu brev, ma et multe bon. On ya potes imaginar, kuale ekselent esero kualitet grafikal de parti ters!

Ekse omni partii sekuantu dati de lor aparasion:

Deo De Guer (PS2) – 22 mars 2005 in Amerik Nordik, 17 novembr 2005 in Yaponia
Deo De Guer II (PS2) – 13 mars 2007 in Amerik Nordik, 25 oktobr 2007 in Yaponia
Deo De Guer: Tradit (telefon portabl) – 20 yuni 2007
Deo De Guer: Kateni De Olimpus (PSP) – 4 mars 2008: Amerik Nordik, 10 yuli 2008: Yaponia
Deo De Guer Kolektad (PS3) – 17 novembr 2009
Deo De Guer III (PS3) – 16 mars 2010!
Deo De Guer Trilogi Edision Ultim (PS3) – mars 2010!

Version yaponik de Deo De Guer III es desined pro diurn 26 de mars 2010!

Atension! Kratos veni denove!

Published in: on January 19, 2010 at 3:29 pm  Leave a Comment  
Tags: , ,

“Skandal in Bohemia” (parti 7)

“Totale tale,” il respondav, iluminante sigaret, e lansante se aut in brasstul. “Vo vis, ma vo no observ. Distingu es klar. Pro eksempl, vo av frekuente vised skal, kel duk a superiore da antekamr a ist kamr.”

“Frekuente.”

“Kefrekuente?”

“Bene, sirka kelksentfoa.”

“Ergo, kuant gradi it av?”

“Kuant? Mi no konos.”

“Totale tale! Vo no av observed. E ye vo av vised. Elkos es yuste mie punkt. Ergo, mi konos, ke es dessept gradi, kause mi av e vised e observed. Pasante, kause vo av interes in ist problemi minim, e kause vo es sufise bon a kronikar un o du eks mie eksperiensi bagatelik, vo potes avar interes in istkos.”

Il lansav papirfoli gros, roskolore tinted, kel avav yasied aperied su tabl.

“It veniav mediu post ultim,” il dikav. “Lekta it sonore.”

Biliet esav sine dat e sine subskribad u adres.

“Sivespre deskuink minuti ante hor okt sert sinior, kel desir konsultar vo di afer de moment leplu profund, visitero vo. Votr servasioni nelongik a un eks domi regik de Europ av monstred, ke vo es hom, kel potes es sekure konfided ko aferi, keli es tante important, ke telkos no potes esar tro multe eksagered. Ist narasion di vo noi av da omni kuartieri resived. Ergo esa in votr kamr in el hor, e no komprenda it male, if votr visitator port mask.”

“Istkos es vere misteri,” mi observav. “Kekos, vo imagin, it signifik?”

“Mi no ankor av kelkun informasion. It es erad prinsipal teoriar ante ke on av informasion. Nesensose on komens torsar fakti a konvenar a teorii, in plas de teorii, keli deberio konvenar a fakti. Ma biliet aut. Kekos vo dekont da it?”

“Skandal in Bohemia” (parti 6)

Il ridav a se aut e frikav sue manui long e nervos yunkte.

“It es simplitet aut”, il dikav; “mie okuli dik a mi, ke interioru votr basbot sinistr, yuste keloke foklum bat it, kuir es kuped per seks kupadi kuasi paralel. Komprendable ili av esed kaused per kelkhom, kel av multe nekurante rased sirka bordi de sole a removar slim krustos da it. Sikause, vo vis, mie dekontasion dupl, ke vo avav esed eksteriore in tempest vilan, e ke vo avav eksempl partikulare malisios de serv bot-fisant in London. Konsernantu votr praktik, if  sinior intr mie kamri odorante kausu iodoform, ko mark negr de nitrat de argent su sue indik-digit dekstr, e konveksitet su flank dekstr de sue silindr-shapó a monstrar, keplase il av okulted sue stetoskop, mi deb esar stupid, vere, if mi no pronunsi il esar membr aktiv de profesion medisinik.”

Mi no potesav sukursar ridasion a fasilitet, ko kel il eksplikav sue prosed de dekontasion. “Kuande mi audi vo donar votr resoni”, mi observav, “kos sempre sembl a mi esar tante ridande simpl, ke mi aut poteserio fasile fasiar it, negligante ke ad omni eksempl suksesiv de votr resonasion mi es perpleksed usk ke vo eksplik votr prosed. E ye mi kred, ke mie okuli es tale bon kuale votri.”

“Skandal in Bohemia” (parti 5)

Tetempe il standav ante miror e spektav mi in sue mod estran e akut.

“Matrimoni konven a vo,” il observav. “Mi pens, Watson, ke vo av ganied sept e demi livri da temp ke mi visav vo.”

“Sept!” mi respondav.

“Vere, mi deberio avar pensed nemulte plu. Sole nemulte plu, mi imagin, Watson. E in praktik denove, mi observ. Vo no dikav a mi, ke vo intensionav andar in harnes.”

“Ergo, kuale vo konos?”

“Mi vis it, mi dekont it. Kuale mi konos, ke vo av multe humidesked nelonge, e ke vo av serv-puera leplu neapt e nekurant?”

“Mie Holmes kar,” mi dikav, “istkos es tro multe. Vo serte averio esed kombusted, if vo averio vived ante kelk sekuli. It es ver, ke mi avav promenad in kampestrad yovdie e veniav a dom in neord teribl, ma kause mi av kambied mie vesti mi no potes imaginar kuale vo dekont it. Konsernantu Mary Jane, ila es nekorigabl, e mie marita av doned ila not, ma denove, mi fali visar, kuale vo ekslabor it.”

“Skandal in Bohemia” (parti 4)

Sert noktu – it esav dudesim mars 1888 – mi returnav da voyaj a pasient (kause mi avav sitempe returned a praktik sivil), kuande mie via dukav mi per Baker Street. Kuande mi pasav visinu porta bene memoried, kel deb sempre esar asosied in mie intelektu ko mie kurtisasion, e ko aksidenti obskur de Studi in Skarlatad, mi esav sised per desir ardoros visar Holmes denove e konosar kuale il usav sue potensi ekstrordinar. Sie kamri esav ilumined in splendor, e, ipse kuande mi spektav a superiore, mi visav sie tali alt e grasil pasar dufoa in figur obskur kontr kortin. Il pasuav per kamr velose, avide, ko sue kap pendant on sie pektor e sue manui tenant unotr forte posterioru il. A mi, kel konosav sie omni temperament e kustom, sie inklinasion e manier dikav lor narasion propr. Il laborav denove. Il avav asended eks sue somnii kreed per drog e esav ardoros su odor de kelkun problem nov. Mi tintinav klok e esav duked a kamr, kel avav posteriore esed partie mie propr.