“Vesti nov de imperator” (parti novim)

Sitempe imperator aut voluav visar it, durante ke it es ankor su teksmashini. Ko multitet integr de homi selekted, inter keli esav et omni du ofisisti ansian e honest, keli avav esed la anteriore, il andav a fraudatori astusios, keli sitempe teksav mediu omni forti, ma sine fili. “Bene, eske istkos no es vere multe bel?” omni du ofisisti honest dikav. “Ke Vostr Ekselens Regik sole admir, kual deliniad, kual kolori!” e a istkos ili monstrav teksmashin vaku, kause ili pensav, ke otri posible vis drap. “Kekos es istkos!” pensav imperator, “mi serte vis nokos! Istkos es teribl! Eske mi es stupid? Eske mi no konven kuale imperator? Istkos eserio kos leplu teribl, kel poteserio aksidar a mi. O, it es multe bel”, imperator tetempe dikav sonore, “it av mie aprobasion leplu alt!” E il movav yukunde kap e spektav teksmashin vaku; il no voluav konfesar, ke il vis nokos. Omni sekuanti, keli il avav ko se, spektav e spektav, ma observav nokos plu ka omni otr; ye ili sempre repetav po imperator: “O, it serte es multe bel!” E ili konsilav a il portar ist vesti multe bel, eks ist material multe bel, primfoa durantu parad solemn, kel esav atended. “Admirabl, multe bel, miraklos!” omni repetav po se resiproke e omni esav multe gaudios. Imperator donav a omni du fraudatori krus kavalerik e titul de teksatori arkan de kurt.